(Vigo).- Diversos activistas de Amnistía Internacional, debidamente identificados con petos da organización, percorrerán esta tarde de 18 a 20 h. a Rúa do Príncipe entregarán información aos viandantes sobre a situación en Gaza e invitarannos a entrar na web de AI en www.es.amnesty.org e asinen un chamamento dirixido ás autoridades de Israel pedindo que cesen os ataques e bombardeos sobre Gaza, o bloqueo e para que se permita o acceso de axuda humanitaria e de testemuñas imparciais.
“O melllor agasallo de Reis para a poboación de Gaza será a solidariedade real, con presión directa sobre as autoridades israelís”, declarou Alberto Estévez, voceiro de Amnistía Internacional en Galicia, que engadiu “AI ofrece un medio sinxelo para que a poboación actúe enviando e-mails de protesta a embajada@embajada-israel.es ou faxes ao nº 91 782 95 55 e mesmo cartas á Embaixada de Israel en Madrid – R/ Velázquez, 150, 7º”.
Máis de 500 palestinos morreron e 2.000 resultaron feridos nos ataques israelís a Gaza desde o 27 de decembro. O lanzamento de proxectís por grupos armados palestinos cara Israel causaron a morte de 5 israelís (tres civís) e decenas de feridos.
O bloqueo israelí a Gaza impide que entren alimentos e menciñas. Os civís palestinos poden morrer ou a resultar feridos en ataques indiscriminados e non teñen a debida atención médica, electricidade, auga. Israel bombardeou numerosos edificios civís que non estaban sendo usados para obxectivos militares como o parlamento, xornais e TV de Hamas, instalacións médicas ou escolas. A axuda humanitaria é de todo xeito insuficiente e a luz inexistente durante horas.
“É esperable que o número de baixas civís siga aumentando pola invasión terrestre iniciado o día 3 de xaneiro e o uso de armas pesadas en zonas densamento poboadas de civís –sinalou Estévez-. AI denunciou a falla da debida atención médica para as centenares de persoas feridas. Os servizos de saúde de Gaza carecen de material abondo, menciñas e especialistas, mesmo nos mellores tempos, pero agora son aínda máis escasas debido ao prolongado bloqueo israelí. Atópanse completamente desbordados e sen posibilidade de atender ao gran número de vítimas causadas.
“É absolutamente inaceptable que Israel continúe privando deliberadamente de alimentos e doutros produtos indispensables a 1,5 millóns de persoas. Esta política non pode xustificarse por razóns de seguridade nin de ningunha outra índole, polo que se lle debe poñer fin de inmediato –afirmou Amnistía Internacional-. Israel debe permitir aos traballadores das organizacións humanitarias e de dereitos humanos o acceso a Gaza de inmediato e en condicións de seguridade”.
Amnistía Internacional reitera o seu chamamento para poñer fin aos ataques imprudentes e ilexítimos de Israel contra zonas residenciais densamente poboadas, que dende o 27 de setembro mataron a máis de 500 palestinos, entre eles civís desarmados e persoal policial que non participaba directamente nas hostilidades, e feriron a máis centenares de persoas.
AI pediu tamén a Hamás e aos demais grupos armados palestinos de Gaza que deixen de lanzar ataques indiscriminados con proxectís contra cidades e vilas do sur de Israel, que mataron a catro civís israelís e feriron a varios máis nos últimos días.
Onte, AI instou ao Consello de Seguridade da ONU a que tome medidas firmes para abordar a situación na Franxa de Gaza e o Sur de Israel, dado que o número de vítimas civís e a destrucción en Gaza non ten precedentes. O Concello debe actuar xa, ante a preocupación pola seguridade do 1,5 millón de palestinos atrapados nunha crecente crisis humanitaria ente continuos ataques israelís e logo de meses de bloqueo. AI solicitou á ONU unha resolución firme de condena dos ataques contra civís por parte de Israel e de Hamas que demande o cesamento inmediato destes ataques, e pediulle que analizase o despregue de observadores internacionais.
Un residente en Gaza, seguidor do partido Fatah do presidente palestino
Mahmoud Abbas, díxolle a Amnistía Internacional: “Os meus fillos ven os folletos e tolean de medo, queren marchar da casa; pero non temos onde ir. A miña familia e a da miña muller viven preto da fronteira, en zonas aínda máis perigosas; e non podemos quedarnos fóra, é igualmente perigoso; houbo casos de rapaces que morreron mentres andaban ou xogaban na rúa. Non hai auga, nin electricidade, non damos atopado comida e non estamos seguros nas nosas vivendas. Non temos nada que ver con Hamas. Eu fun detido e perseguido por Hamas, pero os bombardeos israelíes on indiscriminados. Ninguén está a salvo”.
Amnistía Internacional Galicia -
No hay comentarios:
Publicar un comentario